22 may - Beynəlxalq Bioloji Müxtəliflik Günü münasibətilə Neftçalada nərə cinsindən olan balıqlar təbii su hövzələrinə buraxılıb.
Oxu.Az-ın məlumatına görə, tədbirdə kənd təsərrüfatı naziri Məcnun Məmmədov, ekologiya və təbii sərvətlər nazirinin müavini Vüqar Kərimov, Balıqçılıq və Akvakultura Mərkəzi, IDEA İctimai Birliyi, FAO, Neftçala Rayon İcra Hakimiyyəti, Azerbaijan Fishfarm MMC, Azvarvara MMC və digər qurumların nümayəndələri iştirak ediblər.
Bu tədbir cari ilin ilk kütləvi balıq buraxılışı kimi xüsusi əhəmiyyət kəsb edir və regionda su bioresurslarının bərpasına yönəlmiş ekoloji fəaliyyətlərin davamıdır.
Tədbirdə iştirakçılara bioloji müxtəlifliyin qorunması, nərə növlərinin ekosistemlərdə rolu və su bioresurslarının davamlı idarə olunması ilə bağlı ətraflı məlumat verilib. Maarifləndirmə sessiyası başa çatdıqdan sonra balıqlar uğurla su hövzələrinə buraxılıb.
Bu aksiya ölkədə su bioresurslarının bərpası və bioloji müxtəlifliyin qorunması istiqamətində görülən işlərin vacib tərkib hissəsidir. Tədbir ekoloji maarifləndirmə və Xəzər regionunda nadir balıq növlərinin populyasiyasının dəstəklənməsi baxımından mühüm əhəmiyyət kəsb edir.
