Qurban bayramı ərəfəsində Azərbaycan Qida Təhlükəsizliyi Agentliyi (AQTA) qurbanlıq heyvanların satışı və kəsiminə nəzarəti gücləndirib. Bu, əhalinin sağlamlığını qorumaq, təhlükəsiz ət təmin etmək və ətraf mühiti çirklənmədən qorumaq məqsədi daşıyır.
AQTA-nın şöbə müdiri Qalib Əbdüləliyevin sözlərinə görə, əvvəlki illərdə olduğu kimi, bu il də qurbanlıq heyvanların satışı və kəsimi əvvəlcədən müəyyən edilmiş ünvanlarda, dövlət qurumları ilə koordinasiya şəklində təşkil olunacaq.
Satış və kəsim məntəqələrində yalnız baytarlıq nəzarətindən keçmiş heyvanlar təqdim ediləcək. Kəsim xüsusi baytarlıq-sanitariya tələblərinə cavab verən məntəqələrdə həyata keçiriləcək. Bəzi regionlarda səyyar kəsim çadırları da qurulacaq.
AQTA vətəndaşları qurban kəsimini dini qaydalara və qanunvericiliyə uyğun aparmağa çağırır. Küçə, yol kənarı və digər ictimai yerlərdə heyvan kəsimi və satışı, həmçinin baytarlıq sənədi olmadan heyvan daşınması qadağandır.
