Sabunçu rayonu Zabrat-1 qəsəbəsində küçə işıqlandırmasında problem yaranıb. Sakinlər narahatlıqlarını bildiriblər.
Oxu.Az-ın qaynar xəttinə daxil olan şikayətdə qeyd edilir ki, əsas yolda bir neçə gündür lampalar işləmir. Müvafiq qurumlar əraziyə gəlsə də, işıqlandırma qismən bərpa olunub. Ən təhlükəli hissə – mini-marketin yanı və 118 nömrəli avtobusun döndüyü kəsişmə axşamlar tam qaranlıq qalır.
“Həmin ərazi intensiv hərəkət edən təhlükəli döngələrdəndir. Axşam qaranlığı piyadalar və sürücülər üçün qəza riski yaradır”, – deyə şikayətdə bildirilir.
Sabunçu Rayon İcra Hakimiyyəti faktı təsdiqləyib: “Vidadi küçəsində 2180 nömrəli paylayıcı qurğu zədələnib. Təmir bitdikdən sonra işıqlandırma bərpa olunacaq”.
