Şəmkir şəhəri, Şota Rustavelli küçəsində yaşayan sakinlər ərazidə 50-dən çox evə xidmət göstərən artezian quyusunun iki aya yaxındır ki, işləmədiyindən şikayətçidirlər.
Baku TV-yə açıqlama verən sakinlər bildiriblər ki, artezianın fəaliyyəti əraziyə içməli su çəkilməsi ilə əlaqədar dayandırılıb. Lakin verilən su həm bahadır, həm də keyfiyyətsizdir.
Sakin Vilayət Quliyev deyir: "Nə ağaclarımızı, nə də əkinimizi suvara bilirik. 12 sot ərazi susuzluqdan yanır."
ADSEA-nın Regional Su Meliorasiya Xidmətindən bildirilib ki, Şəmkirin Posanlı, Qaryağdı və Morul kəndlərində əvvəllər mərkəzləşdirilmiş su şəbəkəsi olmadığından subartezian quyularından istifadə olunurdu. İndi isə həmin ərazilər "Şəmkirçay" Sutəmizləyici Qurğular Kompleksindən su alır. Elektrik enerjisinə qənaət etmək üçün subartezian quyuları müvəqqəti dayandırılıb.
Qurum bildirib ki, vətəndaş müraciətləri nəzərə alınaraq həftədə altı dəfə, gündə üç saat artezian quyuları bərpa edilib. Quyulardan əsasən suvarma üçün istifadə olunsa da, bəziləri içməli su kimi istifadə edir və borclarını ödəmir. Yay aylarında çətinlik yaranarsa, quyular yenidən şəbəkəyə qoşulacaq.
