Gecə saatlarında küçələrdən gələn yüksək mühərrik səsləri bir çox vətəndaşın narazılığına səbəb olur. Bəzi sürücülər avtomobillərində idman üslubu yaratmaq məqsədilə xüsusi səsboğucular quraşdırırlar.
Hətta bəzi blogerlər və ustalar bu cür dəyişiklikləri reklam edərək qanuni kimi təqdim edir, sürücüləri təşviq edirlər. Lakin yol polisi tərəfindən aşkarlanarsa, sürücülər cərimələnir və avtomobili əvvəlki vəziyyətinə qaytarmağa məcbur olurlar.
Nəqliyyat eksperti Eldəniz Cəfərov bildirib: "Zavod istehsalı 90 desibel olan avtomobil üçün cərimə yoxdur. Lakin maksimal səs səviyyəsi 96 desibeldir. 98 desibel qurğu üçün 500 manat cərimə var."
Mütəxəssislər xəbərdarlıq edir ki, qeyri-peşəkar müdaxilələr mühərrikə zərər verir və yanacaq sərfiyyatını artırır.
