Azərbaycanda sığorta ödənişləri ilə bağlı yeni tənzimləmə təklif edilir. Artıq ödənişlər əlilliyin deyil, peşə əmək qabiliyyətinin itirilməsi dərəcəsinə əsasən həyata keçiriləcək.
Milli Məclisin Əmək və sosial siyasət komitəsinin iclasında "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanuna dəyişiklik layihəsi müzakirəyə çıxarılıb.
Peşə əmək qabiliyyətinin itirilməsi dərəcəsi, sığorta hadisəsi baş verməzdən əvvəl mövcud olan qabiliyyətin davamlı itirilməsinin faiz ifadəsidir. Yeni təklifə görə, birdəfəlik sığorta ödənişi də bu dərəcəyə əsasən təyin olunacaq.
Birdəfəlik ödəniş, peşə əmək qabiliyyətinin itirilmə dərəcəsi növbəti müayinə müddəti göstərilmədən müəyyən edildikdə həyata keçiriləcək. Qeyd olunur ki, peşə əmək qabiliyyətinin itirilməsi eyni zamanda əlilliyin müəyyən edilməsini də əhatə edir.
