Sumqayıt şəhərinin Hafiz Baxış küçəsi sakinləri Baku TV-nin qaynar xəttinə müraciət ediblər.
Onlar bildiriblər ki, ərazidəki elektrik dirəklərinin bir neçəsi yararsız vəziyyətdədir və bu, ciddi təhlükə yaradır.
"Bir ildir müraciət edirik, istər şifahi, istərsə də ərizə formasında. Amma şikayətimizə baxılmır. Burada elektrik şəbəkəsində yüklənmələr olurdu. Keçən il həmin ərazidə transformator quraşdırıldı, elektrik dirəkləri yeniləndi, xətlər çəkildi və birləşdirildi. Daha sonra xəttdə problem yarandı. Döngə tərəfdə isə rabitə dirəyinin traversi elektrik xəttinə birləşdirilib. Dirək də əyilmiş vəziyyətdədir. Əgər bu dirək aşsa, həm rabitə dirəklərini aşıracaq, həm də elektrik xətlərini zədələyəcək", - deyə sakinlərdən biri bildirib.
Məsələ ilə bağlı "Azərişıq" ASC-dən bildirilib ki, qurum "Sumqayıt Elektrik Şəbəkəsi"nin ərazisində də əsaslı təmir və yenidənqurma işləri həyata keçirir. Sözügedən küçədə 0,4 kV elektrik dayaqları yenilənib, özünü daşıyan izolyasiyalı naqillər çəkilib.
Qeyd olunub ki, 0,4 kV şəbəkədə yenidənqurma işləri aparılarkən elektrik qurğularının quraşdırılması qaydalarının norma və prinsiplərinə əməl olunub. Qaydalara əsasən, 0,4 kV hava xətlərində dayaqlararası məsafə 30-45 metr təşkil edir.
