Azərbaycanlı bloqerlər Vahid Həsənov və Həsti Həsənova Tailandda avtoqəzaya düşüblər.
Oxu.Az xəbər verir ki, bu barədə bloqer H.Həsənova sosial şəbəkədə paylaşım edib.
Onun sözlərinə görə, adadakı son günlərində həyat yoldaşı Vahid Həsənov ilə mopedlə hərəkətdə olarkən qəzaya düşüblər.
Həsti Həsənova bildirib ki, hadisə nəticəsində hər ikisi müxtəlif xəsarətlər alıb. O, qəzadan sonra özünü yerdə gördüyünü, ətrafdakıların kömək etdiyini qeyd edib.
Bloqerə görə, Vahid Həsənov ağır vəziyyətdə xəstəxanaya çatdırılaraq təcili əməliyyata götürülüb. Həkimlər onun doqquz qabırğasında və körpücük sümüyündə sınıq, çiyin nahiyəsində çat aşkarlayıblar.
"Çox çətin hərəkət edir, ayağa qalxmaq, yemək yemək belə çox çətindir", - deyə Həsti Həsənova vurğulayıb.
O özü də qəza zamanı müxtəlif xəsarətlər aldığını, hadisədən sonra güclü şok keçirdiyini bildirib.
