Azərbaycan Yerüstü Nəqliyyat Agentliyinin (AYNA) sədri Anar Rzayev taksilərin avtobus zolaqlarından istifadəsi məsələsinə aydınlıq gətirib.
Rzayev bildirib ki, hazırda bu məsələ gündəmdə deyil: “Avtobusların hərəkət intervalını qorumaq prioritetimizdir”.
O vurğulayıb ki, ictimai nəqliyyatın qrafiki təmin edilməsə, digər tədbirlər mənasız qalır. Sərnişinlərin rahat və vaxtında minməsi əsas məqsəddir.
“Əgər avtobuslar da tıxacda qalacaqsa, insanlar ictimai nəqliyyata üstünlük verməyəcək. Xüsusilə taksi qiymətləri 90 qəpik olanda sərnişin marağı azalırdı”, - deyə Rzayev qeyd edib.
O, beynəlxalq təcrübəyə istinad edərək, Paris, Sinqapur və Nyu-Yorkda avtobus zolaqlarının daha sərt təcrid olunduğunu, Londonda isə nəzarətin gücləndirildiyini bildirib.
Rzayev sui-istifadə ehtimalına da toxunub: “Regionda taksi kartı alıb Bakıda sərnişinsiz avtobus zolağından istifadə edənlər ola bilər. Sistem taksi kimi göstərsə də, faktiki daşıma olmur. Bunu nəzərə almalıyıq”.
O, qərar verməzdən əvvəl nəqliyyat sistemində dəyişikliklər və əlavə tənzimləmələr edilməli olduğunu qeyd edib.
