Uruqvayda 2022-23-cü illərdə yaşanan su böhranı nəticəsində 1.5 milyon insan içməli suya çıxış imkanını itirib.
Oxu.Az xəbər verir ki, bunu Uruqvayın Mənzil və Ərazi Planlaşdırılması Nazirliyinin Ərazi Planlaşdırılması Departamentinin direktoru Paola Florio Bakıda keçirilən Ümumdünya Şəhərsalma Forumu (WUF13) çərçivəsində təşkil olunan sessiyada deyib.
O bildirib ki, uzun illər ərzində Uruqvayda suya çıxış problem hesab olunmayıb: "Biz heç vaxt kranı açanda suyun gəlməyəcəyini düşünməmişdik. Lakin 2022-23-cü illərdə baş verən su böhranı bu təsəvvürü tamamilə dəyişdi."
Paola Florionun sözlərinə görə, ərazilər siyasi sərhədlərlə məhdudlaşmır və su ehtiyatlarının idarəolunmasına kompleks yanaşmaq lazımdır: "Sudan danışarkən təkcə iqlim fəlakətləri ilə bağlı riskləri deyil, həm də suyun miqdarı və keyfiyyəti məsələlərini nəzərə almalıyıq."
O vurğulayıb ki, planlaşdırma yalnız şəhərləri deyil, kənd ərazilərini də əhatə etməli, iqlim dəyişikliklərinə uyğunlaşmanı, içməli su və kanalizasiya infrastrukturunun inkişafını, eləcə də ən həssas əhali qruplarının müdafiəsini nəzərdə tutmalıdır.
