Heydər Əliyev Beynəlxalq Aeroportu BMT-nin Dünya Şəhərsalma Forumu (WUF13) ilə əlaqədar mayın 15-25-də gücləndirilmiş rejimdə fəaliyyət göstərəcək.
Oxu.Az-a verilən məlumata görə, forum çərçivəsində ölkəyə gələcək nümayəndə heyətləri və sərnişin axınının artacağı nəzərə alınıb. Aeroportda əməliyyat, xidmət və təhlükəsizlik sahələrində əlavə koordinasiya mexanizmləri tətbiq olunub.
Məqsəd iştirakçıların rahat, təhlükəsiz və fasiləsiz hərəkətini təmin etməkdir.
WUF13 vaxtı aeroport xüsusi nəqliyyat sisteminə inteqrasiya olunub. Forum iştirakçıları hava limanı, nəqliyyat mərkəzləri, qonaqlama yerləri və tədbir ərazisi arasında fasiləsiz nəqliyyat imkanlarından yararlana biləcəklər.
WUF13 Hava Limanı Servis Avtobusları mayın 12-dən işə başlayıb. Onlar 24 mayadək 24/7 rejimində xidmət göstərəcək. Mayın 25-də isə avtobuslar saat 18:00-dək fəaliyyət göstərəcək.
İştirakçılar aşağıdakı marşrutlardan istifadə edə bilərlər:
• A1 | 28 May
• A2 | Nərimanov
• A3 | İzmir
• A4 | Şıx
• A5 | İçərişəhər
• A6 | Sea Breeze
Həmçinin, Airport Express (H1 xətti) 28 May və Koroğlu metrostansiyalarından Terminal 1 və Terminal 2-yə 24/7 rejimində fəaliyyətini davam etdirir.
Sərnişinlərə uçuş vaxtından ən azı 2-3 saat əvvəl hava limanında olmaları tövsiyə olunur. Onlayn qeydiyyatın istifadəsi məsləhətdir.
