Aprelin 6-da yağan leysan Xaçmaz rayonunun Qaracəlli kəndində ciddi fəsadlara səbəb olub. Alpan çayının daşması nəticəsində kənd sakini Mais Daşdəmirovun evi su altında qalıb.
Mais Daşdəmirov Baku TV-nin qaynar xəttinə müraciət edərək bildirib: “Evin içi bir metrə qədər su ilə dolmuşdu. Soyuducu, televizor, paltaryuyan xarab oldu. Ev təxminən 30-40 santimetr çökdüyü üçün qapı-pəncərələr bağlanmır, divarlar uçur. Fövqəladə Hallar Nazirliyi həyətdə çadır qursa da, xəstə olduğum üçün rütubətli yerdə qala bilmirəm. Hazırda kirayədə yaşayırıq. Dörd nəfərlik ailəmizdən iki oğlum hərbi xidmətdədir. Dəfələrlə müraciət etsəm də, rəsmi akt tərtib olunmayıb.”
Fövqəladə Hallar Nazirliyinin mətbuat xidmətindən bildirilib ki, Nazirlər Kabinetinin 25 may 2026-cı il tarixli məktubuna əsasən, Xaçmaz Rayon İcra Hakimiyyətinin təqdim etdiyi siyahı üzrə qəzalı evlərə texniki baxış keçiriləcək və müvafiq tədbirlər görüləcək.
