Xəzər dənizinin su səviyyəsi həyəcan verici sürətlə azalır. Azərbaycan rəsmisi Əliağa Əzizov "Reuters"ə açıqlamasında narahatedici rəqəmləri açıqlayıb.
Son 5 ildə səviyyə 1 metr, son 10 ildə 1.5 metr, son 30 ildə isə 2.5 metr enib. Hazırda illik azalma 20-30 santimetr təşkil edir ki, bu da qlobal okean səviyyəsinin yüksəlmə sürətindən qat-qat çoxdur.
Rəsminin sözlərinə görə, prosesi dayandırmaq mümkün deyil, yalnız uyğunlaşmaq olar. Səbəblər iqlim dəyişikliyi, az yağıntı, yüksək buxarlanma və çay axınının azalmasıdır.
Bu, limanlara, gəmiçiliyə, balıqçılığa, turizmə və neft-qaz infrastrukturuna ciddi təsir göstərir. Regional əməkdaşlıq üçün hüquqi baza bu ilin sonunadək hazırlanacaq.
