Xırdalan şəhərində Bakı Mühəndislik Universitetinə gedən yol sakinlərin narazılığına səbəb olub. Yol uzun müddətdir bərbad vəziyyətdədir, yağışlı havalarda keçilməz hala düşür, üstəlik kəskin üfunət iyi yayılır.
Oxu.Az-ın sorğusuna cavab olaraq Xırdalan şəhər inzibati ərazi dairəsi üzrə nümayəndəliyindən bildirilib ki, akademik Həsən Əliyev küçəsində bu ilin əvvəlində cari təmir işləri aparılıb. Lakin intensiv yağışlardan sonra qrunt suları fəallaşıb və yol qatının yuyulması baş verib.
Nümayəndəlikdən bildirilib ki, bu barədə aidiyyəti quruma məlumat verilib və yaxın günlərdə qrunt sularının səthinin dəyişdirilməsi istiqamətində işlər başlayacaq.
Eyni zamanda, Prezidentin sərəncamı ilə Pirşağı-Novxanı-Xırdalan-M4 avtomobil yolunun tikintisi davam edir. Akademik Həsən Əliyev küçəsi də bu layihəyə daxildir. Layihə çərçivəsində yolun əsaslı təmiri məqsədəmüvafiq hesab olunmur, çünki 2026-2027-ci illərdə yeni yol istifadəyə veriləcək.
Buna baxmayaraq, keçən həftə nümayəndəlik tərəfindən küçədə yenidən cari təmir işləri aparılıb, karbonat materialı tökülüb. Asfalt sifariş verilib və yol örtüyü quruduqdan sonra işlər başlayacaq.
