Azad edilmiş ərazilərdə hər şey sıfırdan qurulur. Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev Bakıda keçirilən Ümumdunya Şəhərsalma Forumunun 13-cü sessiyasında (WUF13) bu barədə danışıb.
O bildirib ki, mənzil təkcə sosial hüquq deyil, həm də iqtisadi fəaliyyətin hərəkətverici qüvvəsidir. Davamlı inkişaf sosial inklüzivlik olmadan mümkün deyil.
Postmünaqişə şəraitində mənzil təminatı insanların geri qayıdışının ilk əlaməti və etimadın bərpasının əsasını təşkil edir. Şəhərlər, kəndlər və ağıllı kəndlər inşa edilir, hər biri həm sosial, həm də iqtisadi dəyər daşıyır.
Yollar və magistrallar çəkilir, təhsil və səhiyyə obyektləri yaradılır. Evlərin damlarında günəş panelləri quraşdırılır, kommunal xərclər azaldılır. Kəndlərdə xüsusi velosiped yolları salınır ki, insanlar məktəbə və digər məntəqələrə rahat gedə bilsinlər.
