Bu gün Qəməri təqvimi ilə zil-hiccə ayının 9-cu günü İslam dünyasında Ərafat günü kimi qeyd olunur. Milyonlarla zəvvar Rəhmət dağının ətəklərində toplaşaraq günorta namazını qılıb.
Qafqaz Müsəlmanları İdarəsinin (QMİ) Xarici əlaqələr şöbəsinin müdiri Vüsal Cahangiri bildirib ki, azərbaycanlı zəvvarlar xüsusi çadır məntəqəyə daşınıb və ibadətə başlayıblar.
“Ərafat günü həccin ən vacib hissəsidir. Burada olmayan zəvvarın həcci qəbul olunmaz”, - deyə o qeyd edib.
Axşam namazından sonra zəvvarlar Müzdəlifəyə gedəcək, sabah isə Camarata daş atmaq, qurban kəsmək və təvaf etməklə ehramdan çıxacaqlar.
Qeyd edək ki, bu il azərbaycanlı zəvvarlar üçün kvota 1 150 nəfər olub, hər bir zəvvar üçün paketin qiyməti 6 100 ABŞ dolları təşkil edib.
