Milli Məclisin deputatı Zaur Şükürov bildirib ki, Prezident İlham Əliyevin rəhbərliyi ilə aparılan islahatlar sayəsində Azərbaycan rəqəmsal transformasiyada yeni inkişaf mərhələsinə qədəm qoyub.
"Rəqəmsal inkişafın sürətləndirilməsinə dair 2026-2028-ci illər üçün Fəaliyyət Planı" strateji baxışın davamı olaraq texnoloji inkişafı təmin edəcək kompleks tədbirləri əhatə edir.
Deputat qeyd edib ki, rəqəmsal texnologiyalar, süni intellekt, innovasiya və kibertəhlükəsizlik dövlətlərin iqtisadi gücünü və milli təhlükəsizliyini müəyyən edən əsas amillərdir.
Fəaliyyət Planının əsas məqsədləri dövlət idarəetməsinin optimallaşdırılması, elektron xidmətlərin keyfiyyətinin artırılması, beynəlxalq reytinqlərdə mövqeyin möhkəmləndirilməsi və rəqəmsal iqtisadiyyatın ÜDM-də payının artırılmasıdır.
Mühüm institusional addımlardan biri Rəqəmsal İnkişaf Şurasının yaradılmasıdır. İlk iclasda Fəaliyyət Planının icrası, qanunvericilik islahatları və təhsilin rəqəmsallaşdırılması müzakirə olunub.
"mygov" və "mygov Biznes" platformaları üzərində işlər aparılır. Artıq "e-Sosial", "e-Təbib" və "e-Su" tətbiqləri inteqrasiya olunub. Platformanın istifadəçi sayı 3.5 milyona çatıb.
İnnovasiya islahatları Azərbaycanın regional texnologiya mərkəzinə çevrilməsinə xidmət edir. 34 qanuna dəyişiklik əhatə edən genişmiqyaslı islahatlar həyata keçirilir.
Süni intellekt texnologiyalarının inkişafı əsas strateji istiqamətlərdəndir. Cari il ərzində "mygov"da dörd, digər qurumlarda doqquz süni intellekt həlli tətbiq ediləcək.
Kibertəhlükəsizlik sahəsində Milli Kibertəhlükəsizlik Agentliyi və Milli CERT kimi qurumlar yaradılır. Dövlət sistemləri Hökumət Buluduna miqrasiya edilir.
Deputat vurğulayıb ki, rəqəmsal inkişaf siyasəti Azərbaycanın dayanıqlı iqtisadi inkişafına, idarəçiliyin səmərəliliyinə və qlobal rəqabət qabiliyyətinə töhfə verəcək.
