Bakının Nəsimi rayonunda 1990-cı il təvəllüdlü Əkbər kafedə Xalidə qarşı quldurluq etməkdə ittiham olunub. Hadisə ötən il yanvarın 14-də baş verib.
İttihama görə, Tovuz rayon sakini Əkbər gecə saat 03 radələrində kafedə olarkən, sərxoş vəziyyətdə yaxın masada əyləşmiş Xalidin onlarla olan xanıma baxıb söz atması və söyüş söyməsi səbəbindən onu kənara çəkib. Mübahisə zamanı Əkbər Xalidə yumruq və təpik zərbələri vuraraq 500 manatını götürüb qaçıb.
Zərərçəkmiş şikayətində bildirib ki, Əkbər tək deyil, bir qrup şəxslə hücum edib. Buna görə istintaq onu Cinayət Məcəlləsinin 181.2.1-ci maddəsi (qabaqcadan əlbir olan qrup tərəfindən quldurluq) ilə ittiham edib.
Əkbər özünü təqsirli bilməyib. O deyib: “Yanımda qadın vardı. Xalid xanıma söz atdı, söyüş söydü. Mən fikir vermədim, yerimi dəyişdim. Sonra soruşdum niyə söyür, dedi hamıya söyürəm. Kafedən arxaya çıxıb mübahisə etdik, dava oldu. Kameraya baxılmasını təklif etdim, amma baxılmadı”. O, pul oğurluğunu da inkar edib.
Xalid isə deyib: “Dostum Səlimlə kafeyə getmişdik. Mahnı sifarişinə görə anlaşılmazlıq oldu. Əkbər məni çölə çağırdı, içəridə söhbət edərkən kimsə arxadan vurdu. Yıxıldım, 6-7 nəfər məni döydü. Əkbər də aralarında idi. Sonra o, özünü Anar kimi təqdim etdi”. Pul barədə: “Cibimdə 526 manat var idi. Hadisədən sonra pullar yoxa çıxdı. İçkili olduğum üçün təfərrüatı xatırlamıram”.
Bakı Ağır Cinayətlər Məhkəməsində baxılan işdə quldurluq sübuta yetirilmədiyi üçün ittiham Cinayət Məcəlləsinin 128-ci maddəsinə (qəsdən yüngül zərər vurma) tövsif edilib. Məhkəmə Əkbəri təqsirli bilərək amnistiya aktı ilə cəzadan azad edib.
