Siqaret qaçaqmalçılığı ilə bağlı cinayət işində təqsirləndirilən Fariz Məhərrəmovun məhkəməsi keçirilib.
Bakı Ağır Cinayətlər Məhkəməsində hakim Hafiz Kamranovun sədrliyi ilə keçirilən baxış iclasında ona sərbəst ifadə verməsi üçün imkan yaradılıb. Lakin o, ifadə verməkdən imtina edərək, ibtidai istintaqa verdiyi ifadəsini təsdiqləyib və özünü qismən təqsirli bilib.
Fariz Məhərrəmov dövlət ittihamçısının suallarına da cavab verməyib. Şahidlərin dəvət olunması ilə bağlı proses iyunun 19-na təxirə salınıb.
Qeyd edək ki, o, aksiz markası olmayan tütün məmulatlarının qaçaqmalçılığı ilə məşğul olan mütəşəkkil dəstənin üzvlərindən biridir. Onun barəsindəki cinayət işi ayrıca icraata verilib.
Fariz Məhərrəmovla bağlı cinayət işi Baş Prokuror yanında Korrupsiyaya qarşı Mübarizə Baş İdarəsində başlanılıb. Ona Cinayət Məcəlləsinin 206.4, 213-1.2.1 və 213-1.2.3 maddələri ilə ittiham elan edilib və barəsində həbs qətimkan tədbiri seçilib.
