Bakıda "İdrak" liseyində müəlliməni güllələyən yeniyetmənin cinayət işinin məhkəmə baxışı keçirilib.
Bakı Ağır Cinayətlər Məhkəməsində hakim Vüqar Quliyevin sədrliyi ilə keçirilən iclasda vəkillər müvəkkilinin ev dustaqlığına buraxılması və prosesin qapalı keçirilməsini istəyiblər. Qarşı tərəf etiraz etməsə də, hakimlər bu tələbləri təmin etməyib.
Növbəti iclas iyulun 1-nə təyin edilib.
Hadisə fevralın 6-da Binəqədi rayonundakı "İdrak" liseyində baş verib. Baş Prokurorluğun məlumatına görə, şagird odlu silahdan atəş açaraq müəlliməni yaralayıb. Şagird saxlanılıb və fevralın 7-si məhkəmə qərarı ilə 4 ay müddətinə həbs edilib.
Faktla bağlı Binəqədi Rayon Prokurorluğunda cinayət işi başlanılıb. Yeniyetməyə Azərbaycan Cinayət Məcəlləsinin 29, 120.2.2-ci (xuliqanlıq niyyəti ilə adam öldürməyə cəhd) maddəsi ilə ittiham verilib.
