Vətəndaşa qarşı hədə-qorxu gəlməkdə təqsirləndirilən Səid Rüstəmzadənin cinayət işi üzrə məhkəmə prosesi keçirilib.
Bakı Ağır Cinayətlər Məhkəməsində hakim Hafiz Kamranovun sədrliyi ilə keçirilən prosesdə zərərçəkmiş dindirilib.
Zərərçəkmiş bildirib ki, paytaxtın Nəsimi rayonunda masaj salonu işlədib: "Salonda məndən başqa inzibatçı və üç masajçı işləyirdi. Salon qanuni fəaliyyət göstərirdi. Bir nəfər özünü vəzifəli şəxs kimi təqdim edərək salona gəldi. O, salona himayədarlıq edəcəyini və heç bir hüquq-mühafizə orqanı əməkdaşının gəlməyəcəyini bildirdi."
Buna görə ona 3 min manat verib və aylıq ödənişə razılaşıb: "Daha sonra ödəniş edə bilmədim, səhhətimdə problemlərim olduğunu bildirdim. Mənə dedi ki, sənə problem yaradaram."
Şahid Gülnaz Hüseynova ifadəsində bildirib ki, Səid salona daxil olub və müdiriyyəti soruşub: "Kostyumda idi, əlində qırmızı sənəd göstərdi. Sonra müdirlə danışdı. Müdirdən söhbətin yekununu soruşanda dedi ki, Səid masaj salonunun işləməsinə görə 30 min manat tələb edib."
Məhkəmənin növbəti iclası iyunun 8-nə təyin edilib. Səid Rüstəmzadə Cinayət Məcəlləsinin 182.2.4-cü maddəsi (hədə-qorxu ilə tələb etmə) ilə ittiham olunur.
