İngiltərədə 35 yaşlı Paris Uilson keçmiş həyat yoldaşı Denni Kahalaynın 120 min funt sterlinqlik borca görə öldürülməsində narkotik alverçisinə yardım edib. İşin qarşılığında qatilə pul və Türkiyədə hər şey daxil istirahət söz verilib.
Oxu.Az xəbər verir ki, bu barədə "Daily Mail" nəşrində məlumat dərc olunub. Məlumata görə, 2025-ci ilin fevralında iki şəxs 38 yaşlı Kahalaynın Plimut şəhərindəki mənzilinə daxil olaraq üzərinə sulfat turşusu töküblər. Zərərçəkən ciddi yanıq xəsarətləri alıb və bir gözü kor olub. Bir neçə dəri köçürmə əməliyyatına baxmayaraq, xəstə həyatını itirib.
Bu qanlı hadisə Denninin keçmiş arvadının iştirakı ilə planlaşdırılıb. Kahalaynın "Frost" kimi tanınan narkotik alverçisi Rayan Kennediyə böyük borcu olub. "Frost" Uilsona müraciət edib və qadın qətldə iştirak etməyə razılaşıb. Cinayətə görə ona pul mükafatı və Türkiyəyə tam ödənişli səyahət təklif edilib.
Faciəli hadisədən təxminən bir ay öncə cinayətkarlar Kahalaynı oğurlamağa çalışıblar. Onlar qızını Uilsonun yanına qoyduqdan sonra kişini avtomobildən zorla çıxarmağa cəhd etsələr də, bu plan baş tutmayıb. Turşu hücumu gecəsi azyaşlı qız atasının evində, yan otaqda olub.
Məhkəmə prosesi zamanı Uilson cinayətkarlarla əməkdaşlıq etdiyini etiraf etsə də, keçmiş ərinin ölümünü istəmədiyini bildirib. Lakin andlılar məhkəməsi onun bu iddialarını qəbul etməyərək qadını qətldə təqsirli bilib. Kennedinin üzvü olduğu qruplaşmanın rəhbəri isə Dubaya qaçıb gizlənib. Uilson və digər iştirakçılara hökmün nə vaxt elan olunacağı bəlli deyil.
