Bu gün Dövlət İmtahan Mərkəzi (DİM) ali təhsil müəssisələrinin magistraturalarına qəbul imtahanı (II cəhd) keçirəcək.
Oxu.Az xəbər verir ki, imtahan respublikanın 7 şəhər və rayonunda - Bakı, Sumqayıt, Naxçıvan, Gəncə, Abşeron, Mingəçevir və Lənkəranda, ümumilikdə 92 binada təşkil olunacaq.
İmtahan vermək üçün 23 min 89 bakalavr ərizə təqdim edib. Onlardan 21 min 372 nəfəri Azərbaycan bölməsi, 1717 nəfəri rus bölməsi üzrə imtahan verəcək. Bakalavrlardan 15 min 293-ü cari ilin, 7796-sı isə əvvəlki illərin məzunlarıdır, 55 nəfər xarici ölkə vətəndaşıdır.
Bu imtahanda 23 nəfər sağlamlıq imkanları məhdud bakalavr da iştirak edəcək. Onların rahat imtahan verməsi üçün xüsusi zallar ayrılıb, gözdən əlillərə fərdi nəzarətçilər təyin edilib.
İmtahan bütün binalarda saat 10:00-da başlanır. Saat 09:45-də buraxılış rejimi başa çatır.
Magistraturaya qəbul imtahanında xarici dil dinləyib-anlama bacarıqları da yoxlanılır. İmtahan müddəti 3 saat 30 dəqiqədir.
Nəticələr 2 mərhələdə elan olunacaq. İmtahana mobil telefon və digər elektron cihazlar gətirmək qadağandır.
Bakalavrlar imtahana şəxsiyyəti təsdiq edən sənəd və buraxılış vərəqəsi ilə gəlməlidirlər.
