Dövlət İmtahan Mərkəzi (DİM) 26 aprel 2026-cı il tarixində keçirilən 9-cu sinif buraxılış imtahanının nəticələrini elan edib.
İmtahan nəticələrini öyrənmək istəyən şagirdlər DİM-in saytına daxil olaraq iş nömrəsi və şəxsiyyət sənədinin nömrəsi (və ya FİN kodu) ilə nəticələrini görə bilərlər. Həmçinin, mobil operatorlar (Azercell, Bakcell, Nar) vasitəsilə buraxılış vərəqəsindəki kodu 7727 nömrəsinə göndərməklə də nəticə əldə etmək mümkündür.
İmtahan yazı işlərinin yoxlanması onlayn şəkildə aparılıb. Markerlər evdən qoşularaq təsadüfi göndərilən işləri yoxlayıb, üztanıma texnologiyası tətbiq edilib. Bu proqram DİM mütəxəssisləri tərəfindən hazırlanıb.
İmtahanda 55.282 nəfərin iştirakı gözlənilirdi, 398 nəfər gəlməyib. Qayda pozuntusuna görə 2 nəfər xaric edilib. 4 nəfər isə 300 bal toplayaraq ən yüksək nəticəni göstərib.
Apellyasiya Komissiyasına müraciətlər 1 iyun saat 10:00-dan 3 iyun saat 17:00-dək elektron ərizə ilə qəbul ediləcək. Ərizədə tapşırıq nömrəsi, müraciətin məzmunu və meyar bəndi göstərilməlidir. Uyğunsuz cavablar və optik səhvlərlə bağlı müraciətlərə baxılmayacaq.
