Bu gün Bakıda keçirilən Ümumdünya Şəhərsalma Forumunun 13-cü sessiyası (WUF13) yekun sənədlərin qəbulu ilə başa çatıb.
WUF13, Azərbaycanın "Böyük Qayıdış" çərçivəsində formalaşdırdığı şəhərsalma modelinin beynəlxalq standartlara çevrilməsi yolunda mühüm mərhələ oldu.
Forum tərəfindən qəbul edilən "Bakı Fəaliyyətə Çağırış" və nazirlər görüşünün yekun sənədində Azərbaycanın irəli sürdüyü "Təhlükəsiz Qayıdış üçün Ağıllı və Dayanıqlı Məskunlaşma Həlləri Paketi" (4SRP) təşəbbüsü dəstəklənib.
Yüksəksəviyyəli görüşün xülasəsində nazirlər 4SRP təşəbbüsünü alqışlayıblar. Qlobal miqyasda növbəti iki il üçün şəhərsalma siyasəti üzrə tövsiyələri ehtiva edən "Bakı Fəaliyyətə Çağırış"da 4SRP-nin əsas məqsədləri təsdiqlənib.
4SRP, 19 may 2026-cı ildə WUF13 çərçivəsində keçirilən yüksəksəviyyəli paneldə Azərbaycan Dövlət Şəhərsalma və Arxitektura Komitəsi tərəfindən UN-Habitat, BMqT və Baku Hub ilə birgə irəli sürülüb.
Təşəbbüs iqlim dəyişikliyi, ətraf mühitin deqradasiyası, məcburi köç, münaqişə və humanitar həssaslıq kimi çağırışlara inteqrasiya olunmuş şəhərsalma və bərpa yanaşmalarının hazırlanmasını nəzərdə tutur.
Təşəbbüs tərəfdaşları qeyd edir ki, beynəlxalq standartların formalaşdırılmasında Azərbaycanın Qarabağ və Şərqi Zəngəzur iqtisadi rayonlarında həyata keçirdiyi bərpa işləri, "ağıllı şəhər" və "ağıllı kənd" konsepsiyalarının tətbiqi təcrübəsindən istifadə olunacaq.
4SRP postmünaqişə və həssas regionlar üçün şəhərsalma modellərinin hazırlanması, beynəlxalq təşviqi və iqlim maliyyəsinə çıxış imkanlarının asanlaşdırılması üçün platforma kimi qiymətləndirilir.
