DİM 7 iyun 2026-cı il tarixində keçirilmiş qəbul imtahanının nəticələrini elan edib.
Burlaxatun Məcidli I ixtisas qrupu üzrə 700 bal toplayaraq ölkə birincisi olub.
AzEdu.az onunla həmsöhbət olub. Burlaxatun 700 balın həm zəhmət, həm də şans olduğunu deyib.
“İmtahan öncəsi 700 balın bir az şans olduğunu düşünürdüm. Amma indi reallaşdı. Qapalı suallarımın hamısı düz idi, açıqlar da tam bal gətirdi. Əvvəlcə inanmadım, nəticəni təkrar yoxladım”, - o bildirib.
Burlaxatun ADA Universitetində memarlıq ixtisasına hazırlaşdığını qeyd edib: “Hazırlıq dövründə repetitorlarla dərs etmişəm. Cəmiyyətdə yüksək bal toplayan şagirdlərin telefonunun olmadığı fikri yanlışdır. Mən həm sosial həyat yaşadım, həm də telefondan istifadə etdim”.
O, abituriyentlərə tövsiyəsini bildirib: “Yalnız bala fokuslanmayın. Həm təhsil, həm də sosial həyatınızı qoruyun. Uğurumun sirri isə çox çalışmaq və özünə inanmaqdır”.
