Elm və təhsil naziri Emin Əmrullayev sertifikatlaşdırmadan keçən 91 mindən çox müəllimin maaşına əlavə edildiyini açıqlayıb.
Nazir "Sertifikatlaşdırma: səriştəli müəllim - keyfiyyətli təhsil" tədbirində bildirib ki, 2022-2026-cı illərdə 104 435 pedaqoq imtahanlara cəlb olunub. Bunlardan 60 818 müəllim 10 faiz, 30 590 müəllim isə 35 faiz əməkhaqqı artımı qazanıb.
Ümumilikdə 91 408 müəllimin maaşı artırılıb. Hər iki cəhddə keçid balını toplamayan 9 334 müəllimin əmək müqaviləsinə xitam verilib.
Statistikaya görə, iştirakçıların 58 faizi 30-50 bal, 29 faizi 51 və yuxarı bal toplayıb. 9 faizi ikinci cəhddə, 4 faizi isə birinci cəhddə keçid balını toplaya bilməyib. 2026-cı il üçün 20 229 nəfər müsahibə mərhələsində iştirak edəcək.
