Qazaxıstan Nəqliyyat Nazirliyi 25 dekabr 2024-cü ildə Aktau yaxınlığında qəzaya uğrayan AZAL-a məxsus Embraer 190-ün araşdırmasını davam etdirir. Qurum araşdırma başa çatdıqdan sonra yekun hesabatı ictimaiyyətə təqdim edəcəyini bildirib.
Nazirlik rəsmiləri TASS-a açıqlamasında araşdırma komissiyasının Beynəlxalq Mülki Aviasiya Konvensiyasının 13-cü əlavəsinə uyğun işlədiyini və yekun sənədin rəsmi saytda dərc ediləcəyini qeyd ediblər. Hesabatda qəzanın dəqiq səbəbləri, komissiyanın qənaətləri və tövsiyələri yer alacaq.
Xatırladaq ki, Bakı-Qroznı reysini yerinə yetirən təyyarədə 5 ekipaj üzvü də daxil olmaqla 67 nəfər olub. Azərbaycan, Rusiya, Qazaxıstan və Qırğızıstan vətəndaşlarından ibarət sərnişinlərdən 29 nəfər sağ qalıb. Qəzadan sonra qara qutular Braziliyada açılıb və əldə edilən məlumatlar Qazaxıstana göndərilib. Fevral ayında dərc edilən ilkin hesabat hadisələrin xronologiyası və zədələrin fotoşəkillərini əhatə edib.
Daha ətraflı: AZAL, Aktau qəzası, Aviasiya təhlükəsizliyi
