Dövlət Komitəsinin məlumatına görə, ötən il aliment ödəməkdən yayınan 4299 nəfər barəsində inzibati xəta protokolu tərtib edilib. Onlardan 2344 nəfər həbs edilib, 235 nəfərlə bağlı cinayət işi başlanılıb.
Statistika göstərir ki, aliment ödənilməməsi minlərlə ailənin əsas sosial problemi olaraq qalır. Məhkəmə qərarı olsa belə, uşaqların yükü valideynlərin birinin üzərinə düşür.
Ekspertlər deyir ki, borcluların çoxu rəsmi gəliri olmayan və ya məsuliyyətdən yayınan şəxslərdir. Bu səbəbdən aliment fondunun yaradılması yenidən gündəmə gəlib.
Təklif olunan modelə əsasən, dövlət əvvəlcə alimenti ödəyir, sonra borcludan geri alır. Lakin bəzi ekspertlər bu mexanizmi real saymır.
Millət vəkili Jalə Əliyeva bildirib: "Aliment fondu yalnız uzun müddət ödəniş edə bilməyənlərə şamil olunmalı, sui-istifadə halları nəzərə alınmalıdır."
Mütəxəssislər qeyd edir ki, bir sıra ölkələrdə aliment fondları dövlət subsidiyaları hesabına işləyir. Azərbaycanda isə borcluların əksəriyyətinin rəsmi gəliri və sabit iş yeri yoxdur.
