Şirin spirtli içkilər quru şərab və şəkərsiz tünd içkilərdən daha çox kaloriyə malikdir. Lakin ekspertlər deyir ki, çəki artımının əsas səbəbi alkoqol deyil, həddindən artıq yeməkdir.
Rusiyalı terapevt və diyetoloq Yelena Ustinova Gazeta.ru-ya bildirib ki, spirtli içkilərin əsas komponenti etil spirtidir (etanol). Məsələn, 100 ml quru şərabda təxminən 11-12 qram etanol var, qalanı sudur. Araq və konyakda etanol miqdarı 40%-ə çatır.
Həkim spirtli içkiləri şirin və şəkərsiz olmaqla iki qrupa ayırır. Likörlər, meyvəli içkilər, tündləşdirilmiş şərablar və kokteyllər şirin qrupdadır. Onların yüksək kalorisi şəkər və karbohidratlardan qaynaqlanır.
Etil spirti enerji versə də, onun metabolizmi fərqlidir. Etanoldan alınan enerji birbaşa piyə çevrilmir, əsasən istilik istehsalına sərf olunur. Buna görə də spirt içdikdən sonra isinmə hiss edirik.
Bədən quruluşuna diqqət edənlərə quru şərab və ya şəkərsiz tünd içkilər (araq, tekila, konyak) seçmək məsləhət görülür. Bu içkilərdə şəkər miqdarı azdır.
Ustinova vurğulayır: Əsas məqam alkoqolun iştahı artırmasıdır. Bir neçə qədəhdən sonra özünənəzarət zəifləyir, insan planlaşdırdığından çox yemək yeyir. Həddindən artıq yeməyin ən çox yayılmış səbəbi budur. Üstəlik, spirt adətən yağlı yeməklərlə müşayiət olunur, nəticədə maye ləngiməsi şişkinlik və çəki artımı yaradır.
Mütəxəssis qeyd edir: İnsan iştahına nəzarət edə bilirsə, şirin qəlyanaltısız bir-iki qədəh quru şərab çəkiyə ciddi təsir etmir. Lakin bol spirtli və yüksəkkalorili yeməklərlə uzun ziyafətlər çəki artımına səbəb olur.
