Fraunhofer İnstitutunun süni intellekt və maşın öyrənməsi üzrə tədqiqat qrupunun rəhbəri, Brandenburq Texniki Universitetinin professoru Konstanse Çope, Avropada Yaşayan Azərbaycanlı Mühəndislərin III Forumunda iştirak edib.
O, forumun alman və azərbaycanlı mühəndislər arasında təcrübə mübadiləsi və əlaqələrin möhkəmləndirilməsi üçün mühüm platforma olduğunu vurğulayıb.
Professor qeyd edib ki, bu cür tədbirlər beynəlxalq əməkdaşlığın inkişafına kömək edir və mütəxəssislərə bilik və qabaqcıl təcrübələrini bölüşməyə imkan verir. O, əlavə edib ki, onun komandasında azərbaycanlı mütəxəssis çalışır.
Çope həmçinin “Ağıllı şəhər”lərin yaradılmasında Avropa təcrübəsi mövzusunda təqdimatla çıxış edib və süni intellekt texnologiyalarının əhəmiyyətini vurğulayıb.
