İntensiv yağıntılar səbəbindən sürüşmənin baş verdiyi Altıağac-Xızı avtomobil yolunda Prezidentin sərəncamı ilə bərpa işlərinə başlanılıb.
Azərbaycan Avtomobil Yolları Dövlət Agentliyi bildirir ki, ərazidə canlı qüvvə və xüsusi texnika cəlb olunub. Deformasiyaya uğramış hissələr bərpa edilir, torpaq kütlələri təmizlənir və yol yatağı möhkəmləndirilir.
Məqsəd nəqliyyat vasitələrinin təhlükəsiz hərəkətini təmin etmək və bölgədə nəqliyyat əlaqəsini tam bərpa etməkdir. Yağıntılı hava risklərini azaltmaq üçün əlavə tədbirlər görülür.
Sərəncama əsasən, ölkə üzrə 25 avtomobil yolunda yağış və sel fəsadlarının aradan qaldırılması nəzərdə tutulub. Zərər görmüş infrastruktur, körpü və suötürücü qurğular təmir ediləcək, təhlükəli ərazilərdə mühafizə gücləndiriləcək.
