Dövlət Şəhərsalma və Arxitektura Komitəsinin sədri, WUF13-ün milli koordinatoru Anar Quliyev bildirib ki, Nazirlər Şurasının iclasında növbəti 10 il üçün hədəflər müzakirə ediləcək.
Oxu.Az xəbər verir ki, bu fikirlər WUF13 çərçivəsində Azərbaycanın sədrliyi ilə keçirilən Yeni Şəhərsalma Proqramına dair nazirlər səviyyəsində görüşdə səslənib.
Anar Quliyev qeyd edib ki, dünya şəhərləri mənzil çatışmazlığı problemi ilə üzləşir. Beynəlxalq əməkdaşlıq bu baxımdan vacibdir.
O, 2016-cı ildə qəbul edilmiş gündəlik üzrə uğurları nəzərdən keçirməyin və növbəti 10 il üçün hədəfləri müzakirə etməyin zəruriliyini vurğulayıb.
“Mənzil məsələsi təhsil və səhiyyə ilə birbaşa bağlıdır. Şəhərlərdə əhalinin sayı artıb, bu yeni çağırışlar yaradıb. Nazirlər Şurasının görüşü qlobal dialoq üçün ən mühüm tədbirlərdəndir. Qarşıdakı onilliklərlə bağlı hədəflərimizi müəyyənləşdirəcəyik. Bu iclas gələn ay BMT-də keçiriləcək əsas görüşə hazırlıqdır.”
