Aqrar Sığorta Fondu (ASF) son günlər artan vəhşi heyvan hücumları ilə bağlı fermerlərə rəsmi müraciət edib.
Qurumdan verilən məlumata görə, ölkənin müxtəlif bölgələrində canavar və digər vəhşi heyvanlar təsərrüfatlara hücum edərək mal-qaranı tələf edir. Xüsusilə qış-yaz aylarında tez-tez baş verən bu hadisələr fermerlərə böyük maddi ziyan vurur.
ASF fermerlərə dövlət dəstəkli aqrar sığorta mexanizmini xatırladır. Bu sistem bitkiçilik, balıqçılıq və heyvandarlıq təsərrüfatlarını müxtəlif risklərdən, o cümlədən vəhşi heyvan hücumlarından qoruyur.
Sığorta haqqının 50%-i dövlət tərəfindən qarşılandığı üçün fermerlər cüzi məbləğ ödəyərək heyvanlarını sığortalaya bilər. Məsələn, 300 manatlıq qoyunun illik sığortası cəmi 7-11 manat, 1000 manatlıq mal-qaranın sığortası isə 24-39 manat təşkil edir.
Fond fəaliyyətə başladığı gündən heyvandarlıq sığortası üzrə 3.5 milyon manat zərər ödəyib. Yalnız bu ilin ilk 4 ayında 230 min manat kompensasiya verilib. ASF fermerləri bu əlverişli imkandan yararlanmağa çağırır.
