Mayın 16-sı Azərbaycanın Xalq artisti Arif Quliyevin doğum günüdür.
O, 1950-ci ildə Şirvan şəhərində anadan olub.
Aktyor 1965-ci ildə Bakı Mədəni-Maarif Texnikumunun dram kino aktyorluğu fakültəsinə daxil olub.
1968-ci ildə təhsilini başa vuraraq Mingəçevir Dövlət Dram Teatrına təyinatla göndərilib.
1973-cü ildə İncəsənət İnstitutunun musiqi komediya aktyorluğu fakültəsinə daxil olan Quliyev 1975-ci ildə Musiqili Komediya Teatrına dəvət edilib.
Teatr səhnəsində bir çox unudulmaz obrazlar yaradıb: Şərbətəli, Salyanski, Əli, Dursun, Mürsəl, İbişov, Dursunov, Tofiq, Hambal, Mirzəqulu, Səbzəli.
Azərbaycan Televiziyasında Şans, Qayınana, Lift əhvalatı, Evləri köndələn yar kimi teletamaşalarda rol alıb.
O, İrəvan Dövlət Azərbaycan Dram Teatrında da çalışıb və 1988-ci ildən Özəl Satira Teatrının bədii rəhbəri olub.
1982-ci ildə Respublika Gənclər Mükafatına, 1989-cu ildə Əməkdar artist, 1993-cü ildə isə Humay mükafatına layiq görülüb.
1993-cü ildə Milli Dram Teatrına dəvət olunan aktyor həmin il Xalq artisti adını alıb.
2006-cı ildə Qızıl Dərviş, 2012-ci ildə Zirvə, 2014-cü ildə Sənətkar medalı ilə təltif edilib.
Arif Quliyev 7 may 2021-ci ildə COVID-19 səbəbindən vəfat edib. O, Qurd qapısı qəbiristanlığında dəfn olunub.
