12 ay əvvəl velosiped sürməyi belə bilməyən Hikmət Xəlil bu gün Avropanın yollarında minlərlə kilometr qət edir. Almaniyada yaşayır, çadırda gecələyir, müxtəlif ölkələrdən insanlarla tanış olur və hər dayanacaqda Azərbaycan haqqında danışır.
Son bir ildə 12 ölkə gəzən, 12 min kilometrdən çox yol qət edən Hikmət deyir: "Bu səyahət mənə təkcə yeni şəhərlər yox, həm də yeni insanlar və həyata fərqli baxış qazandırdı."
Oxu.Az Almaniyadan yola çıxaraq Avropanı velosipedlə kəşf edən azərbaycanlı səyyah Hikmət Xəlillə həmsöhbət olub.
İdeya necə yarandı?
Hər şey iş yerində tanış olduğu Polinin xəyalına dəstək olmaq istəyi ilə başlayıb. Polin Almaniyadan Tailana qədər velosipedlə getməyi planlaşdırırdı. Hikmət ona kömək etmək üçün velosiped səyahətləri haqqında kitablar oxumağa, videolar izləməyə başlayıb. Zaman keçdikcə onun da marağı yaranıb. Həmin vaxta qədər nə velosipedi var idi, nə də sürməyi bacarırdı.
Polindən birlikdə dünya səyahətinə çıxmaq təklifi alsa da, təhsili ilə əlaqədar 2028-ci ilə qədər Almaniyada qalmalı idi. Lakin dünya səyahəti ideyası beynində qaldı və öz xəyalına çevrildi.
Məqsəd nədir?
Hikmət terapevt kimi çalışır və hər gün çox sayda insanla ünsiyyətdə olur. Almaniyada yaşayan insanların həyata baxışı ona təsir edib: "Gəncsən, get dünyanı gəz, həyatını yaşa. Yaşlandıqda bunu etmək çox çətin olacaq."
Bu sözlər onu düşündürüb. O, gələcəkdə "kaş ki, etmiş olaydım" deməmək üçün arzularını təxirə salmamağa qərar verib.
Səyahət insanları tanıtdı, yoxsa özünü?
Hikmət deyir: "Düşünürəm ki, bu səyahət mənə həm insanları, həm də özümü daha yaxşı tanımağa kömək edib. Amma seçim etməli olsam, deyərdim ki, insanları tanımaq mənə daha böyük təsir göstərib."
Səyahət zamanı fərqli millətlərdən, dinlərdən və mədəniyyətlərdən olan insanlarla tanış olub. Maraqlıdır ki, siyasi baxışları, dinləri, dilləri fərqli olsa da, insanların əksəriyyətinin arzuları, qorxuları və xoşbəxtlik anlayışı bir-birinə çox bənzəyir.
"Ən böyük qazancım insanların düşündüyümüzdən daha mehriban və yardımsevər olduğunu görmək oldu."
Azərbaycanın tanıdılması
Videolarının böyük hissəsində Azərbaycanın tanıdılması xətti var. Rastlaşdığı insanlar ölkəmiz haqqında nə deyir? Hikmət deyir: "İnsanların Azərbaycana münasibəti məni müsbət mənada təəccübləndirdi. Avropada Azərbaycana maraq göstərən insanların sayı heç də az deyil."
Bəzən Azərbaycanı tanımasalar da, Bakı adını eşidəndə "Formula 1", "Avroviziya" və ya Qarabağ mövzusunu xatırlayırlar. Lakin ölkəmizin zəngin təbiəti, mətbəxi, tarixi və qonaqpərvər insanları haqqında az məlumatları olur.
Kameranı söndürəndən sonra ən ağır anlar
Sosial şəbəkələrdə hər şey asan görünə bilər. Amma kameranı söndürəndən sonra səyahətin görünməyən tərəfləri var: günlərlə davam edən fiziki yorğunluq, uzun sürüşlərdən sonra yaranan ağrılar, gecə çadıra dolan ağcaqanadlar, su və qida ehtiyatının tükənməsi.
"Hər gün harada gecələyəcəyini, hava şəraitinin necə olacağını dəqiq bilmirsən. Amma məhz bu çətinliklər səyahəti maraqlı edir."
Fiziki çətinlik ağırdır, yoxsa psixoloji?
Hikmət üçün psixoloji tərəfi daha ağırdır. Fiziki yorğunluğa insan öyrəşir, lakin psixoloji çətinliklər fərqlidir: "Bəzən günlərlə tək olursan, hava şəraiti pis olur, planlar pozulur. Belə anlarda motivasiyanı qorumaq fiziki gücdən daha vacibdir."
Bir il ərzində 12 ölkə gəzib, 12 min kilometrdən çox yol qət edib. Səyahət ona səbirli olmağı, qeyri-müəyyənliklə barışmağı və problemlərə daha sakit yanaşmağı öyrədib.
İlk günlə bugünkü Hikmət arasında fərq
Ən böyük fərq baxış bucağındadır. Səyahətə başlamazdan əvvəl plansızlıq onu narahat edirdi. Bu gün isə başa düşür ki, həyatda hər şeyi planlaşdırmaq mümkün deyil və ən gözəl təcrübələr planlaşdırılmamış anlardan yaranır.
"Artıq insanlardan, təbiətdən və qeyri-müəyyənlikdən əvvəlki qədər qorxmuram. Bu səyahət mənə insanlara daha çox güvənməyi öyrətdi."
"Burada yaşaya bilərəm" dediyi şəhər
Frayburq şəhəri. Səbəb təkcə şəhərin gözəlliyi deyil, Morell ailəsidir. Hikmət Almaniyaya ilk gəldiyi zaman onların yanında "Au-Pair" proqramı olaraq yaşayıb. Münasibətləri əsl ailə münasibətinə çevrilib. "Morell ailəsi olmasaydı, yəqin ki, Almaniyanı çoxdan tərk edib başqa ölkəyə köçmüşdüm."
Hollandların təəccüblü qonaqpərvərliyi
Hans adlı kempinq sahibi heç bir rezervasiyası olmadığı halda ona qalmağa icazə verib, ödəniş tələb etməyib, yemək verib. Səbəb kimi bildirib ki, gənclərə dəstək olunmalıdır. "Bir insanın kiçik görünən yaxşılığı başqasının yaddaşında illərlə qalır."
Avropada görüb Azərbaycanda görmək istədiyi xüsusiyyət
İnsanların həyatdan zövq almağı bacarması. Avropalı gələcəyini planlaşdırır, məsuliyyətlərini yerinə yetirir, amma bu günü yaşamağı unutmur. "Bizim cəmiyyətdə valideynlər çox vaxt övladları üçün öz arzularından imtina edirlər. Avropada isə insanlar övladlarını sevməklə yanaşı, öz həyatlarını da yaşayırlar."
Azərbaycan insanında üstün hesab etdiyi xüsusiyyətlər
İstiqanlılıq, qohumcanlılıq, böyüyə və kiçiyə hörmət. "Altı ildir Almaniyada yaşayıram və bu xüsusiyyətləri burada eyni səviyyədə görməmişəm. Azərbaycanın ən böyük sərvətlərindən biri insan münasibətləri və ailə bağlarıdır."
Ən dəyərli məsləhət
70 yaşlı alman səyyah Haralddan: "Həyat velosiped sürmək kimidir. Tarazlığı qorumaq üçün hərəkət etməyə davam etməlisən." Və öz fikrini əlavə edib: "Nə etməyindən asılı olmayaraq, xəyallarının arxasınca pedal çevirməyə davam et."
