Azərbaycanda yay mövsümü olsa da, avtomobil bazarında ənənəvi canlanma müşahidə olunmur. Bu barədə "Azərbaycan Avtomobil Dilerləri Assosiasiyası" (AADA) İctimai Birliyinin İdarə Heyətinin sədri Eyyub Əliyev məlumat verib.
Satışlar gözlənilən səviyyədə deyil və bazarda hələ də ötən ildən qalan problemlər hiss olunur. Əsas səbəblərdən biri ekoloji təmiz nəqliyyat vasitələrinə tətbiq olunan gömrük və vergi güzəştlərinin bu ildən ləğv edilməsidir.
Güzəştlərin müddətinin uzadılmayacağı ötən ilin III rübündən məlum idi. Paralel idxalla məşğul olan şəxslər və investorlar bazara rekord sayda avtomobil gətiriblər. Həmin dövrdə avtomobillər 5-10 gün ərzində satılırdı. Lakin bu ilin əvvəlindən satışlar kəskin zəifləyib.
Qiymətlər maya dəyərindən aşağı düşüb
Satışın zəifləməsi idxalçıların aylarla avtomobil sata bilməməsinə səbəb olub. Satıcılar avtomobilləri əvvəlcə maya dəyərinə, daha sonra isə maya dəyərindən aşağı qiymətə satışa çıxarmağa başlayıblar. Bazarda "qiymət müharibəsi" gedir.
Qiymətlərin demək olar ki, hər gün dəyişməsi alıcıların davranışına da təsir edib. İnsanlar alış qərarını təxirə salır, bu da qeyri-müəyyənliyi artırır. Ötən il idxal edilmiş avtomobillərin sayı real tələbi üstələdiyi üçün bazarda böyük həcmdə satılmamış avtomobil ehtiyatı formalaşıb.
İkinci əl bazarında müsbət dinamika
Yeni avtomobillərlə bağlı çətinliklərə baxmayaraq, ikinci əl avtomobil bazarında müsbət dinamika müşahidə olunur. Xüsusilə Cənubi Koreya, Yaponiya və Almaniya istehsalı olan avtomobillərin satışları artmağa başlayıb. Lakin bu, bütün marka və modellərə aid deyil.
Rəsmi dilerlər də qiymət siyasətini dəyişiblər
Rəsmi dilerlər istehsalçı zavodlarla apardıqları danışıqlar nəticəsində avtomobilləri daha münasib qiymətlərlə təklif etməyə başlayıblar. Bu, rəsmi dilerlərlə paralel idxalçılar arasındakı qiymət fərqinin azalmasına səbəb olub.
Çindən avtomobillərin ixracı ilə bağlı tətbiq edilən yeni qaydalar da bazara təsir göstərir. Altı ay qaydası bazarda tarazlığın formalaşmasına kömək edə bilər.
Ekspert rəyi: bazarda sabitlik gözlənilir
Azərbaycan Qiymətləndiricilər Palatasının üzvü Hüseyn Talıbov bildirib ki, yay mövsümündə aktivlik məhduddur. Alıcılar daha ehtiyatlıdır. İnflyasiya, yüksək faiz dərəcələri tələbi zəiflədir. Ən çox 8-12 yaşlı, iqtisadi sinfə aid avtomobillər satılır.
Hazırda təklif tələbi üstələyir. İkinci əl avtomobillərin əhəmiyyətli hissəsi ilkin elan qiymətindən orta hesabla 5-10% aşağı qiymətə satılır. Yay sonuna qədər kəskin qiymət dəyişiklikləri gözlənilmir.
