Mayın 3-də keçirilən Azərbaycan dili (dövlət dili) fənni üzrə test imtahanının nəticələri açıqlanıb.
Dövlət İmtahan Mərkəzi (DİM) bildirib ki, nəticələr rəsmi saytda yerləşdirilib. Cari ilin məzunları 8 rəqəmli şagird kodu və şəxsiyyət sənədi nömrəsi ilə, əvvəlki illərin məzunları isə şəxsi kabinet vasitəsilə nəticələrə baxa bilər.
İmtahanda iştirakı nəzərdə tutulan 29 182 nəfərdən 477 nəfər gəlməyib. Cari il məzunları üçün maksimum bal 100-dür. Nəticə yekun attestasiya sənədinə yazılacaq.
Ali və orta ixtisas təhsili müəssisələrinə qəbul üçün bal 50 və yuxarı olduqda “məqbul” sayılır. Fərqli dildə təhsil alan əvvəlki il məzunları 30 bal toplaya bilər, “məqbul” üçün minimum 15 bal tələb olunur.
“Qeyri-məqbul” alanlar 21 iyun imtahanında iştirak edə bilər. Qeydiyyat 25 may-2 iyun arasıdır.
Apellyasiya üçün müraciət 19 may saat 10:00-dan 21 may saat 17:00-dək elektron ərizə ilə qəbul olunur. Ərizədə tapşırıq nömrəsi və müraciətin məzmunu göstərilməlidir. Cavab vərəqində təlimata uyğun olmayan qeydlərlə bağlı müraciətlərə baxılmayacaq.
