Son günlər mətbuatda "AzParking" mobil tətbiqində texniki xətalar səbəbindən sürücülərin cərimələnməsi ilə bağlı iddialar yayılıb.
"AzParking" yayılan iddialarla bağlı rəsmi məlumat yayıb. Bildirilib ki, istifadəçi tətbiq üzərindən seans başladaraq ödəniş edirsə, bu əməliyyat hər iki sistemdə rəqəmsal iz buraxır. Sistemdə məlumat mübadiləsinin asinxronizasiyası texniki cəhətdən qeyri-mümkündür.
Araşdırma nəticəsində məlum olub ki, iddia edilən vaxt intervalında mərkəzi serverə heç bir uğurlu parklanma seansı sorğusu daxil olmayıb. Həmçinin həmin istifadəçinin iddia etdiyi ödəniş nə bank tarixçəsində, nə də "AzParking" sistemində əks olunmur.
Bir əməliyyatın baş tutması üçün vəsaitin silinməsi bank tərəfindən təsdiqlənməlidir. Əgər bank çıxarışında ödəniş yoxdursa, bu texniki nasazlıq deyil, tranzaksiyanın istifadəçi cihazındakı lokal səbəblərdən yekunlaşmamasıdır. Belə hallarda balansdan heç bir vəsait çıxılmır.
Yarana biləcək suallarla bağlı AYNA-nın "141" çağrı mərkəzinə müraciət edə bilərsiniz. Bank çıxarışı ilə sübut olunan hər bir uğurlu ödəniş halı dərhal araşdırılır.
