Azərbaycanda sosial şəbəkə provayderləri üçün ciddi cərimələr tətbiq olunur. Yeni qanun layihəsinə əsasən, qaydaları pozan şirkətlər 50 min manata qədər cərimələnə bilər.
Layihə "İnformasiya, informasiyalaşdırma və informasiyanın mühafizəsi haqqında" Qanuna və İnzibati Xətalar Məcəlləsinə dəyişiklikləri nəzərdə tutur. Məqsəd uşaqların təhlükəsizliyini təmin etməkdir.
Provayderlər 16-18 yaş arası istifadəçilərin hesablarını xüsusi təhlükəsizlik tədbirləri ilə qorumalıdır. Zərərli məzmun 24 saat ərzində silinməlidir.
Cərimələr məlumat təqdim etməməyə görə 6-20 min, sorğulara cavab verməməyə görə 7-30 min, təhlükəsizlik tədbirlərinə əməl etməməyə görə 8-40 min, təkrar pozuntulara görə 9-50 min manat arasında dəyişir.
Qanun dərc edildikdən 12 ay sonra qüvvəyə minəcək.
