Bakı və Abşeron yarımadasında may ayı ərzində hava temperaturu iqlim norması ilə müqayisədə 22 gün yüksək, 9 gün isə aşağı olub. Bu barədə Milli Hidrometeorologiya Xidmətinin rəisi Nazim Mahmudov məlumat verib.
Orta aylıq temperatur 18°C qeydə alınıb ki, bu da normaldan 1°C yuxarıdır. Maksimal temperatur Maştağada mayın 13-də 32°C, bölgələrdə isə Kürdəmirdə 33°C olub. Minimal temperatur Bakıda 9°C, dağlıq ərazilərdə isə Şahdağda 2°C şaxta qeydə alınıb.
Yağıntıların miqdarı normanı xeyli aşıb. Ən çox yağıntı Bakı və Abşerona düşüb – 148 mm (normanın 749%-i). Balakən-Şəki zonasında 206 mm, Lənkəran-Astarada 85 mm yağıntı qeydə alınıb. Mayın 9-da Şahdağda qar örtüyünün hündürlüyü 9 sm-ə çatıb.
Ay ərzində dolu hadisələri də müşahidə olunub. Dolu əsasən Bakı, Abşeron, Gədəbəy, Şəmkir, Şuşa və digər rayonlarda qeydə alınıb. Dolu dənələrinin diametri 4-20 mm, ən böyük dolu isə Oğuz rayonunda 30 mm olub.
Küləkli günlərin sayı Bakıda 11, bölgələrdə 18 gün olub. Maksimal külək sürəti 28 m/s-ə çatıb. Ümumilikdə 10 sarı və narıncı xəbərdarlıq verilib.
