Bakı, 17-22 may 2026-cı il tarixlərində Ümumdünya Şəhərsalma Forumunun 13-cü sessiyasına (WUF13) ev sahibliyi edəcək. Forum çərçivəsində keçiriləcək "Urban Expo" sərgisi 66 ölkədən 217-dən çox təşkilatı bir araya gətirəcək.
3,5 hektar ərazini əhatə edən sərgi Bakı Olimpiya Stadionunda təşkil olunacaq. Burada hökumətlər, vətəndaş cəmiyyəti, akademik dairələr və özəl sektor nümayəndələri "Hər kəs üçün yaşayış yerləri" mövzusu ətrafında fikir mübadiləsi aparacaqlar.
Sərgidə mənzil təminatı, iqlimədavamlılıq, rəqəmsal innovasiya və inklüziv şəhərsalma sahələrində müxtəlif yanaşmalar nümayiş olunacaq. Xüsusi olaraq vətəndaş cəmiyyətinin iştirakı rekord səviyyədə olacaq.
WUF13 Bulvarı adlı 2,5 hektarlıq açıq hava məkanı şəbəkələşmə və qeyri-rəsmi müzakirələr üçün nəzərdə tutulub. "Şəhər kitabxanası", "Şəhər kinoteatrı" və "WUF Akademiyası" kimi məkanlar ziyarətçiləri gözləyir.
Sərgi 17 maydan açıq olacaq, rəsmi açılış isə 18 may saat 10:00-da baş tutacaq. Lentkəsmə mərasimində Anar Quliyev və Anaklaudia Rossbax iştirak edəcək.
