Bakıda skuter və velosipedlər gənclər üçün artıq sadəcə əyləncə deyil, gündəlik həyatın ayrılmaz hissəsinə çevrilib. Tıxaclardan qurtulmaq və vaxta qənaət etmək üçün əsas alternativ olan mikromobillik getdikcə populyarlaşır.
Azərbaycan Yerüstü Nəqliyyat Agentliyinin (AYNA) məlumatına görə, gənclər arasında mikromobilliyi təşviq etmək üçün yeni tədbirlər planı hazırlanır. Yaxın aylarda ictimaiyyətə təqdim olunacaq bu plan, artan tələbatı qarşılamaq məqsədi daşıyır.
AYNA-dan bildirilib ki, artıq Bakıda 63,2 kilometr mikromobillik zolağı salınıb. Skuterlər üçün 1000, velosipedlər üçün isə 623 parklanma məntəqəsi yaradılıb. Hazırda icarəyə verilən skuterlərin sayı 4161, velosipedlərin sayı isə 2200-dür.
Statistik göstəricilər mikromobilliyə tələbin sürətlə artdığını göstərir. 2026-cı ilin ilk 4 ayında Bakı şəhəri üzrə mikromobillik vasitələri 1 044 615 dəfə sifariş olunub və 2 085 306 km məsafə qət edilib. Bu, əvvəlki illə müqayisədə sifariş sayında 1,5 dəfə, qət edilən məsafədə isə 1,1 dəfə artım deməkdir.
“APAR” şirkətinin direktoru Əli Əhmədlinin sözlərinə görə, gənclər arasında mikromobilliyə maraq artıb: “Velosiped və skuterlər artıq təkcə əyləncə deyil, gündəlik hərəkət vasitəsidir. Universitetə, işə gedərkən gənclər çevik seçimlərə üstünlük verir. İstifadəçilərimizin əksəriyyəti gənclərdir.”
Ən çox rastlaşılan problemin düzgün parklanma qaydalarına riayət edilməməsi olduğunu deyən Əhmədli, bəzən vasitələrin parkinq zonasından kənarda saxlanmasının piyadalar və digər hərəkət iştirakçıları üçün maneə yaratdığını bildirib.
Nəqliyyat məsələləri üzrə ekspert Rauf Ağamirzəyev qeyd edir ki, mikromobillik Bakıda reallıqdır: “İstifadəçi sayı artır, xüsusən elektroskuter və elektrovelosipedlər populyardır. Qəzaların sayında ciddi azalma var, ölümlə nəticələnən hadisələr olmayıb.”
Ekspert gənclər üçün daha cəlbedici paketlər və təbliğat işlərinin genişləndirilməsini vacib hesab edir. “Multimodal səfərlərdə tələbələr avtobus əvəzinə mikromobillik vasitələrindən istifadə edə bilər. Universitet müəllimləri də mikromobilliyi tamhüquqlu nəqliyyat növü kimi qəbul etməlidir.”
