Bakıda orta məktəb şagirdi təhsil aldığı müəssisədə təhqir edilib. Suraxanı rayonunun Dədə Qorqud qəsəbəsində yaşayan Ceyran Kazımova Oxu.Az-a müraciət edərək bildirib ki, oğlu Hacət Nemət oğlu Bədəlov 315 nömrəli tam orta məktəbin 8B sinfində oxuyur.
Bir müddət əvvəl ingilis dili müəllimi Rahibə dərs zamanı oğlunu sinif qarşısında təhqir edib. Şagirdin nəfəs problemi olduğu üçün saqqız çeynədiyini deyən valideyn, müəllimin saqqızı uşağın başına yapışdırdığını iddia edir.
Hadisədən sonra uşaq psixoloji sarsıntı keçirib, məktəbə gedə bilmir. Valideyn hüquq-mühafizə orqanlarına müraciət edib.
Bakı Şəhəri üzrə Təhsil İdarəsindən bildirilib ki, araşdırma nəticəsində iddia əsassız hesab olunub. Elm və Təhsil Nazirliyinin Uşaq Müdafiəsi İdarəsi də araşdırma aparır.
