Paytaxtın Nərimanov rayonunda piyadaların hərəkətini məhdudlaşdıran obyekt sakinləri narazı salıb. Xan Şuşinski və Həsən Əliyev küçələrinin kəsişməsindəki tikili səkinin üzərində inşa edilib.
Oxu.Az-ın məlumatına görə, üç ildir Bakıda yaşayan bir sakin hər gün eyni mənzərə ilə qarşılaşdığını deyib. Obyekt tamamilə səkinin üstündədir və hətta işıqforun qarşısını kəsib.
Hüquqşünas Vüsal Cəfərov qeyd edib ki, səkilərin zəbt olunması Şəhərsalma və Tikinti Məcəlləsinə əsasən müfəssəl planın pozulmasıdır. İnzibati Xətalar Məcəlləsinin 394-cü maddəsinə görə, fiziki şəxslər 300-500 manat, vəzifəli şəxslər 1500-2500 manat, hüquqi şəxslər isə 15-25 min manat cərimə oluna bilər.
Nərimanov Rayon Mənzil-Kommunal Təsərrüfatı Birliyindən bildirilib ki, tikili uzun illər öncə inşa edilib və sökülməsi yalnız məhkəmə qərarı ilə mümkündür.
