Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı çərçivəsində piyada zonalarının yaradılması işləri sürətlə davam edir.
Oxu.Az xəbər verir ki, Baku TV-nin videomaterialında bu layihə haqqında ətraflı məlumat verilib.
Layihəyə əsasən, paytaxtın iki əsas piyada zonası - "Atatürk" və "Antena" parkları bir-biri ilə birləşdirilir.
Qeyd edək ki, sözügedən ərazi əvvəllər piyadalar üçün çoxsaylı maneələrin və nizamsız parklanma yerlərinin mövcud olduğu məkanlardan biri olub. Layihənin məqsədi həmin ərazini rahat və təhlükəsiz şəhər mühitinə çevirməkdir.
Artıq Bakı sakinləri və qonaqlar maneəsiz şəkildə "Atatürk" parkından "Antena" parkına, oradan isə "Dədə Qorqud" parkına keçid edə biləcəklər.
"Atatürk" parkının giriş hissəsində yaşıllıq zonası, oturacaqlar, uşaq meydançası və digər infrastruktur obyektləri yaradılacaq. Həmçinin ictimai nəqliyyat və ticarət obyektləri arasında rahat piyada əlaqəsi təmin olunacaq.
