Bakının Xətai rayonunda səhər saatlarında baş verən yol qəzası nəticəsində 8 Noyabr prospekti ilə Xəqani Rüstəmov küçəsinin kəsişməsindəki işıqfor və idarəetmə qutusu sıradan çıxıb.
Daxili İşlər Nazirliyinin Nəqliyyatı İntellektual İdarəetmə Mərkəzindən (NİİM) verilən məlumata görə, qəza səbəbindən həmin kəsişmədəki digər işıqforlar da işlək vəziyyətdə deyil.
Mərkəz bildirib ki, yeni işıqfor və idarəetmə qutusunun quraşdırılması üçün tədbirlərə başlanılıb. İşlər tamamlanana qədər yol hərəkəti səyyar işıqfor vasitəsilə tənzimlənəcək.
Bundan başqa, Sabunçu rayonu, Zabrat-Maştağa yolunda da oxşar qəza qeydə alınıb. Həmin ərazidə də səyyar işıqfor quraşdırılıb.
Bakı qəzaları ilə bağlı NİİM sürücülərə müraciət edib: Yollarda işıqforlar işləmədikdə və nizamlayıcı olmadıqda, kəsişmə nizamlanmayan hesab olunur. Bu zaman sürücülər "Yol hərəkəti haqqında" Qanunun 77-ci maddəsinə əməl etməlidirlər.
Daha ətraflı yol hərəkəti qaydaları haqqında oxuyun.
