Vətəndaş Tahir Xudiyev Baku TV-yə açıqlamasında iddia edib ki, 2016-cı ildə ona məxsus əmlak sökülərkən yerində tikiləcək yeni yaşayış binasından mənzil, ofis və parklanma yeri veriləcəyi vəd olunsa da, bu öhdəliklər yerinə yetirilmir.
T.Xudiyev məsələ ilə bağlı deyib: "2016-cı ildə bizimlə görüşdülər və ərazidəki tikilinin söküləcəyini dedilər. Bunun bir dövlət layihəsi olduğunu bildirərək bizimlə müqavilə imzaladılar. Müqaviləyə əsasən, dövlətin pilot layihəsi olduğu üçün biz iki ildən sonra həmin binaya köçməli idik".
Nizami Rayon İcra Hakimiyyətindən bildirilib ki, 2016-cı ildə pilot layihə çərçivəsində "Vesta Construction" MMC tərəfindən Şirin Mirzəyev və Mehdi Abbasov küçələrinin kəsişməsində çoxmənzilli yaşayış binalarının inşasına başlanılıb və vətəndaşlarla fərdi qaydada müqavilələr imzalanıb. Lakin şirkət ötən müddət ərzində öhdəliklərini yerinə yetirməyib.
MMC və Tahir Xudiyev arasında notarial qaydada razılaşma əldə olunub. Dəfələrlə görüşlər keçirilsə də, nəticə olmayıb. Vətəndaşa məhkəməyə müraciət hüququ izah olunsa da, bu addım atılmayıb. "Vesta Construction"-un tikinti işlərini tamamlamaması ilə bağlı Rayon Prokurorluğu tərəfindən cinayət işi açılıb və istintaq davam edir.
