17 may 2026-cı il tarixində ali təhsil müəssisələrinin magistraturalarına qəbul imtahanı (II cəhd) keçiriləcək. Bu barədə Dövlət İmtahan Mərkəzi məlumat yayıb.
İmtahan respublikanın yeddi şəhər və rayonunda - Bakı, Sumqayıt, Naxçıvan, Gəncə, Abşeron, Mingəçevir və Lənkəranda, ümumilikdə 92 binada təşkil olunacaq.
İmtahan bütün binalarda eyni vaxtda - saat 10:00-da başlanır. İmtahanın başlanmasına 15 dəqiqə qalmış, saat 09:45-də buraxılış rejimi başa çatır. Bundan sonra gələn iştirakçılar imtahan binasına buraxılmır.
İmtahanda bakalavrların xarici dil üzrə dinləyib-anlama bacarıqları yoxlanılır. İmtahan dinləmə mətninin səsləndirilməsi ilə başlanacaq. Mətnin səsləndirilməsinə hazırlıq və binada sakitliyin təmin olunması ilə əlaqədar imtahanın başlanmasına 15 dəqiqə qalmış hər kəs zalda olmalıdır.
İmtahanın müddəti 3 saat 30 dəqiqədir. İmtahanın başlandığı andan üç saat sonra test tapşırıqlarının cavablandırılması üçün ayrılan vaxt başa çatır və cavab kartları yığılır. Bundan sonra iştirakçılara esse vərəqləri paylanır. Esselərin yazılmasına 30 dəqiqə vaxt verilir.
İmtahan nəticələri iki mərhələdə elan olunacaq. İmtahandan sonrakı iki-üç gün ərzində qapalı və cavabları kodlaşdırılan açıq tipli tapşırıqların nəticələri elan olunacaq. Yekun imtahan balı isə esse tapşırıqları yoxlanıldıqdan sonra təqdim olunacaq.
İmtahan iştirakçıları "Yaddaş kitabçası" ilə tanış ola bilərlər.
İmtahan binasına mobil telefon, kalkulyator, kitab, çanta kimi əşyaların gətirilməsi qadağandır.
Ərizələrin qəbulu 1-14 aprel tarixlərində aparılıb. İmtahanda iştirak etmək üçün 23 089 bakalavr ərizə təqdim edib. Onlardan 21 372 nəfər Azərbaycan bölməsi, 1 717 nəfəri rus bölməsi üzrə imtahan verəcək. Bakalavrlardan 15 293-ü cari ilin, 7 796-sı isə əvvəlki illərin məzunlarıdır, 55 nəfər xarici ölkə vətəndaşıdır.
İmtahanda 23 nəfər sağlamlıq imkanları məhdud bakalavr da iştirak edəcək. Onlar üçün xüsusi zallar ayrılıb, gözdən əlillərə fərdi nəzarətçilər təyin edilib.
Qeydiyyatdan keçmiş bakalavrlar mayın 8-dən etibarən DİM-in saytından "İmtahana buraxılış vərəqəsi"ni çap edirlər. İmtahana gələrkən şəxsiyyət vəsiqəsi və buraxılış vərəqəsi mütləq tələb olunur.
