Bakı Dövlət Universitetində (BDU) paytaxtda keçiriləcək Ümumdünya Şəhərsalma Forumunun 13-cü Sessiyası (WUF13) ilə bağlı məlumatlandırma sessiyası təşkil olunub.
Oxu.Az "Report"a istinadən xəbər verir ki, tədbirdə universitetin tələbə və müəllim heyəti iştirak edib.
BDU-nun prorektoru Əliş Ağamirzəyev bildirib: "Azərbaycan son illərdə çoxsaylı nüfuzlu beynəlxalq tədbirlərə ev sahibliyi edib. WUF13 da onlardan biridir."
Prorektor qeyd edib ki, BDU tələbələri forum çərçivəsində maarifləndirici layihələrə qoşulurlar. O, Azərbaycanın zəngin şəhərsalma ənənələrini və Bakının memarlıq cazibəsini vurğulayıb.
Dövlət Şəhərsalma və Arxitektura Komitəsinin mətbuat katibi Ramiz Həsənov deyib: "Azərbaycanın şəhərsalma layihələri beynəlxalq maraq doğurur. Bakının WUF13-ə ev sahibliyi etməsi buna sübutdur."
WUF13 Əməliyyat Şirkətinin meneceri Emin Hüseynzadə forumun 2001-ci ildə təsis edildiyini və BMT-nin qanunvericilik səlahiyyəti olmayan ən böyük qlobal tədbiri olduğunu bildirib.
Sessiyanın sonunda iştirakçıların sualları cavablandırılıb. Qeyd edək ki, mayın 17-22-də Bakıda keçiriləcək WUF13 ilə əlaqədar ölkənin müxtəlif şəhərlərində WUF13 Festivalı təşkil olunub.
